Месси «Интер Майамимен» келісімшартты ұзартуы мүмкін
Аргентина құрамасының капитаны Лионель Месси мен АҚШ-тың «Интер Майами» клубы жаңа келісімшарт жасасу бағытында келіссөздер жүргізіп жатыр. Бұл туралы Marca басылымы хабарлады.
Қазіргі келісімшарт 2025 жылдың соңына дейін жарамды. Алайда тараптар оны кемінде бір жылға ұзартуға ниетті. Жаңа келісім бойынша, Месси клуб сапында 2026 жылғы әлем чемпионатына дейін өнер көрсетуі ықтимал.
Marca дерегінше, клубтық әлем чемпионатынан шығып қалғаннан кейін Месси алдағы басты мақсат ретінде МЛС-те чемпион атануды көздеп отыр. Сонымен қатар ол Лигалар кубогында да жеңіске жетуді қалайды.
Қазіргі таңда «Интер Майами» Шығыс конференциясында алтыншы орында тұр. Команда көшбасшы «Филадельфиядан» 11 ұпайға қалып келеді, алайда төрт ойынға кем өткізген.
Айта кетейік, Месси алдағы уақытта МЛС пен Лига MX жұлдыздары арасындағы Матчқа қатысуы мүмкін. Сондай-ақ, ол 2023 жылы жеңіске жеткен Лигалар кубогында да командаға көмектеспек.